خزان اولجاق سوسار بولبول ولی بستاندان آیریلماز
اؤزو ساكت اولورسا ، فطرتی داستاندان آیریلماز
منه غربت بهشت اولسا ، نهایتده غریبم من
آنایورد قایغیسی، هئچوقت آییق وجداندان آیریلماز
وفانی، ظلم ایله سورگون دوشن یوسف دن اؤیرندیم
اؤزو قول تك ساتیلمیشسا، اوره ك كنعاندان آیریلماز
بلادان جان قاچیرماز عهدینه ثابت قالان عاشق
آدی اوستونده دیر، طوفان قوشو طوفاندان آیریلماز
دئسم جانیم سنه قربان ، ده گیل بو شأنینه لایق
دئسم كؤنلوم سنه پیشكش، كؤنول كی، جاندان آیریلماز
شاخان شیمشكلری سؤندورمه ظالم، سن بیلیرسن می
كی اودلار اؤلكه سینده ، اود - الوو وولقاندان آیریلماز
جهاندا كیم گؤروب قان قارداشی قارداشدان آیریلسین
قورو جان، جاندان آیریلسا ، قیزیل قان قاندان آیریلماز
ریاسیز عاشق اولسان ، آیریلیق افسانه دیر ، سؤنمز
حقیقی عشق بیر بالدیر كی، شهدی شاندان آیریلماز
استاد کریم مشروطه چی