دانیش
ای کمان ابرو نگاریم شانه دن تئل دن دانیش
زولفووی افشان ائدیب باد صبا یئل دن دانیش
قاشلارون محرابی گرچی سجده گاهیم دیر منیم
آت منیم افسانه می٬ دؤنده رسؤزو٬ائل دن دانیش
«اصلی»نی سال خاطیره قویما چیخا یاددان «کرم»
بیر اوجا بویلو«سارادان»کؤرپودن٬سئل دن دانیش
سؤیله«طاهر»زهره دن سال یاده عذرا وامقی
گول کیمین قیرمیز یاناقدان اینچه بیر بئل دن دانیش
بیستوندان تیشه دن٬شیرین دانیش فرهاد اؤچون
لیلی دن مجنونیدن دیوانه دن چؤلدن دانیش
صحبتی چک گلشنه گلزاره٬ گلشندن باغا
سؤیله بولبولدن٬ دي سونبولدن قاییت گولدن دانیش
شرح وئر عاشقلرین٬بیربیرگؤزه ل افسانه سین
شمع دن ٬ پروانه دن ٬ رندانه محفل دن دانیش
یوسفی بازاره چک یعقوبون احوالین سوروش
دون زلیخادن عزیز مصردن٬ نیل دن دانیش
[ بازدید : 67 ] [ امتیاز : 3 ] [ امتیاز شما : ]